हरिवनकाे घुर्कौलीस्थित बालगृहले बाढीमा परेर टुहुरा भएका २५ बालबालिकाको पालनपोषण गर्ने

हरिवन, २७ भदौ – हरिवन नगरपालिका-५, घुर्कौलीस्थित द्वन्द्व पीडित बालगृहले भोटेकोशी बाढीमा परेर अभिभावक गुमाएका २५ जना बालबालिकाको संरक्षण गर्ने भएको छ ।

चेतना सन्देश नेपालले संचालन गरिरहेको बाल गृहले गएसाँझ पत्रकार सम्मेलनको आयोजना गरी प्रलयकारी भोटेकोशी बाढीपछि अभिभावकविहीन भएका २५ जना बालबालिकाको पालनपोषणको जिम्मेवारी लिने घोषणा गरेको हो । भोटेकोशी बाढीबाट देशले ठूलो क्षति बेहोरेको अवस्थामा आफूहरुले पनि संस्थागतरुपमै निर्णय गरी बाढी पीडित २५ जना बालबालिकालाई बालगृहमा ल्याएर संरक्षण गर्ने निर्णय गरेको बालगृहका अध्यक्ष सुरेन्द्र लामाले पत्रकार सम्मेलनमा बताए ।

बाढीबाट अति प्रभावित रसुवा, धादिङ र नुवाकोट जिल्लाका बालबालिका ल्याउनका लागि जिल्ला प्रशासन कार्यालय सर्लाहीमार्फत प्रक्रिया अघि बढाइसकिएको बालगृहले जनाएको छ ।

बालगृहमा अहिले पनि अभिभावकविहीन २८ जना बालबालिकालाई पठनपाठनसहित आश्रय दिएर राखिएको छ ।