२८ भदौ, काठमाडौं । नेपाल कम्युनिस्ट पार्टी (नेकपा) को युवा संगठन वाइसीएल बाढीग्रस्त क्षेत्रमा अस्थायी आवास निर्माण गर्ने कार्यमा जुटेको छ ।

पहिले चरणमा नुवाकोटको बेलकोटगढी–७ को ठुलो खोला , लामोस्वती , रातमाटे, महादेवफाँटका प्रभावित परिवारको लागि १५० वटा अस्थायी आवास निर्माण गरिने वाइसीएलका अध्यक्ष पुष्प ओलीले जानकारी गराए ।

ओलीका अनुसार बाढी प्रभावित क्षेत्रमा वाईसीएलले ६०० स्वयंसेवक उद्धार तथा राहत कार्यमा नियमित परिचालन गरिरहेको छ । प्रभावित क्षेत्रमा बेपत्ताको खोजी तथा उद्धारसँगै घाइतेहरूको उपचार, खाद्यान्न तथा आवश्यक राहत सामग्री उपलब्ध गराउन सक्रिय रहेको उनले जानकारी गराए ।

रसुवा ग्यास, पेट्रोल, सोलार लाइट, चामल, नुन, तेल, दाल, पावर बैंक, मोबाइल सेटहरू, सेनिटरी प्याड, म्याट्रिक्स लगायत सामग्री पुर्‍याइएको संगठनले जनाएको छ ।

त्रिशुली पारी सडक सञ्जाल विच्छेद भए पश्चात धादिङको बाटो भई कठिनपूर्वक विदुर नगरपालिकाकाका वडाहरु ७, ८ र ९ मा सामग्री पुर्‍याइएको ओलीले जानकारी गराए । ‘आजसम्म पनि पिडित परिवारको घर सरसफाई हुन् सकिरहेको छैन । वास को टुंगो छैन,’ ओलीले भने,‘यहि समस्यालाई मध्यनजर गर्दै अस्थायी आवास निर्माणको कार्यमा जुटेका छौं ।

मातृ पार्टी संयोजक प्रचण्डको निर्देशन र स्थानीय आवश्यकता अनुसार काम भइरहेको अध्यक्ष ओलीले बताए । अभियान मार्फत बाढी पीडितहरूलाई खाना पकाउने ग्यास , खाद्यान्न उपलब्ध गराइरहेको छ , चरम ग्यास अभावका बाबजुद सीमित श्रोत ,साधन, केन्द्र सरकारको असहयोग लगायतका प्रतिकुलताका बाबजुद सांगठनिक जनसम्पर्क केहि सहयोगी दाताहरूको सहयोग मार्फत काम गरिरहेको ओलीले जानकारी दिए ।