ऊर्जा सङ्कट चर्किएपछि बङ्गलादेशमा विपक्षी सडकमा, सरकारविरुद्ध प्रदर्शन

ढाका । खाना पकाउने ग्यास, विद्युत् तथा मलको अभाव बढ्दै गएपछि बङ्गलादेशमा विपक्षी दलका हजारौँ समर्थक सरकारविरुद्ध सडकमा उत्रिएका छन्।

शनिबार राजधानी ढाकामा आयोजित प्रदर्शनमा सहभागीहरूले नियमित ग्यास आपूर्ति, पर्याप्त विद्युत् तथा मलको सहज उपलब्धताको माग गरेका छन्। ब्यानर र प्लेकार्डसहित भेला भएका प्रदर्शनकारीले सरकारको ऊर्जा तथा अत्यावश्यक वस्तु व्यवस्थापनप्रति असन्तुष्टि जनाएका थिए। 

प्रदर्शनपछि विपक्षी समर्थकहरूले बन्दरगाह सहर चट्टोग्रामतर्फ पदयात्रा सुरु गरेका छन्। यात्राका क्रममा विभिन्न स्थानमा थप विरोध कार्यक्रम आयोजना गर्ने बताइएको छ।

विपक्षी नेता शफिकुर रहमानले आन्दोलनको मुख्य उद्देश्य प्रत्येक घरमा नियमित ग्यास र विद्युत् सेवा सुनिश्चित गर्नु रहेको बताए। उनका अनुसार आम नागरिकले दैनिक जीवनमा भोगिरहेको ऊर्जा सङ्कट समाधान गर्न सरकारमाथि दबाब सिर्जना गर्नु आन्दोलनको उद्देश्य हो।

बङ्गलादेशमा मध्यपूर्वमा जारी युद्धलगायतका कारण इन्धन तथा अन्य अत्यावश्यक वस्तुको अभाव बढेको बताइएको छ। ऊर्जा सङ्कट समाधान गर्न सरकारले प्रभावकारी कदम चाल्न नसकेको भन्दै विपक्षी दलहरूले आलोचना गर्दै आएका छन्।

यसैबीच, उच्च विद्युत् महसुलको विरोध गरेका एक कलेज विद्यार्थीलाई वरिष्ठ सरकारी अधिकारीको अपमान गरेको आरोपमा पक्राउ गरिएको घटनाले पनि सरकारको आलोचना बढाएको छ। विपक्षी तथा आलोचकहरूले उक्त घटनालाई सरकारप्रति असहमति राख्ने आवाजमाथि दबाब बढेको उदाहरणका रूपमा व्याख्या गरेका छन्।

नेसनल सिटिजन पार्टीका नेता अख्तर हुसेनले सरकार ग्यास, विद्युत् र मलको आपूर्ति व्यवस्थापनमा असफल भएको आरोप लगाए। उनले जनताको समस्या समाधान गर्न नसके सरकारलाई त्यसको राजनीतिक परिणाम भोग्नुपर्ने चेतावनीसमेत दिएका छन्।

प्रधानमन्त्री तारिक रहमानको नेतृत्वमा सरकार गठन भएको करिब छ महिनापछि भएको यो प्रदर्शनलाई सरकारविरुद्धको पहिलो ठूलो सडक आन्दोलनका रूपमा हेरिएको छ।